*Bapak, Bapa, Rama*
KRRA. Purbodipuro
Kenging menapa asring wonten kang nglepataken utawi kirang nyarujuki yen ngangge panyebutan *Bapa* kangge piyayi sanes ? Mangga kasemak andharan ing ngandhap punika 👇🏻 :
Tembung *Bapa* ing sanjawinipun Kraton mliginipun Ngayogyakarta taksih mardika, Dhateng Bausastra ugi kaserat kinarya Krama saking *Bapak*
Dhateng lebet Kraton Ngayogyakarta pancen tembung *Bapa* punika wonten trep trepanipun kangge sinten, inggih punika kangge panyebutanipun Bapa Paman garwanipun Biyung Emban (Rewang kraton, Pamomongipun putra-putri dalem) satemah ing nJawi wonten kang kagungan pawadan yen ngaturi piyayi sanes ngangge sebutan *Bapa* menika kaanggep kirang ngajeni, Nanging estunipun boten makaten, kedah pilah-pilah boten kacarub wor, Basa lebet kraton kagunaaken ing kraton, Basa jaba kraton kagunaaken ing pabrayan limrah. Lan kepara ugi sampun dados pasarujukan ing Kongres Bahasa Jawa lan sampun kaserat ugi ing Bausastra yen tembung Bapa kinarya krama saking Bapak.
Secara Umum yen badhe dipun-bentenaken / Undha usuking tembung:
- Bapak : Sebutan kangge tiyang sepuh ( Orang tua ayah biologis)
- Bapa : Orang tua/ tiyang sepuh asuh ( Bapa Guru, Bapa Paman, lsp)
- Rama : Sebutan kangge piyayi kakung sepuh kang pinunjul babagan kawruh kebatinan / Supranatural, Spirituwal (Rama kyai, Rama Resi, Rama Pendhita lsp)
Miturut unggah-ungguhipun basa :
- Bapak : Ngoko
- Bapa : Krama madya
- Rama : Krama inggil
Nanging *Bapak* punika ugi sampun Krama Ngoko ateges nadyan boten dipunkramaaken boten menapa (boten saru)
Dhateng lebet Kraton Surakarta para putra-putri dalem panyebutipun kaliyan Bapakipun inggih *Bapak Sinuwun* boten Rama Sinuwun menapa Bapa Sinuwun.
Yen dhateng nJawi sesebutan Bapak, Bapa, Rama kangge nyebutaken ayah biologis sedaya saged kaginaaken nanging udhunipun kang benten, inggih punika
- Bapak - Simbok
- Bapa - Biyung
- Rama - Ibu
Dadossss, wonten ing sanjawinipun baluwarti (Njaba kraton) mliginipun Kraton Ngayogyakarta, tembung *Bapa* punika ugi taksih kaanggep kirang trep jalaran wonten saperangan warga Yogya kang taksih nulad lan migunaaken basa lebet kraton nadyan pinuju ing njaba keraton, nanging cara lumrahipun ing sanjawi kraton tembung *Bapa* taksih saged kaginaaken lan saged kangge sulih tembung bapak lan taksih trep, leres, lan laras. Krana cara umum *Bapa* punika krama saking *Bapak* .
Makaten sapala bab tembung Bapak, Bapa, Rama. Mugi piguna nadyan sapala kangge kula lan para kadang-kadang PPJ.
